René Caylus dich "Lo Comisset"

(lo poèta dau Poget)

Trach del Bram de setembre 2000

Una publicacion novèla

Lo Cercle Occitan de Clarmont- d’Erau, ven de faire editar l'òbra de René
CAYLUS dich "lou Coumisset", félibre nascut al Pouget (34)
Aquel libre de 162 paginas : " PASSEJADA DINS LAS NIVOUS" es de format A4. Mòstra per cada poèma, tres biaises : lengadocian de Clarmont, occitan en grafia I.E.O., francés e mai un dessenh original en color.

Vendut a prètz de còst : 90F + pòrt : 21F
De comandar plan lèu ( tiratge limitat) a :
Bibliothèque municipale occitane
14 rue Louis blanc
34800.-Clermont l'Hérault
tel:04/67/96/05/77

Òbra de granda qualitat.

ME PRESENTI

Qualques vèrses, amic, per far ma coneissença
Ò nani, siòi pas un òme de sabença !
Durant un mièg de sègle, clinat sus lo socam,
Ai passat en susant ma vida de pacan.
Uèi, dins mon ostalet, vivi ma retirada
Gardant lo sovenir de mas bèlas annadas.
Aimi la poësia, los libres, las cançons,
La beutat de las flors, lo cant dels aucelons.
Aimi faire de vèrses, "Polimnia" es ma musa,
Tot côp nos atissam, es aquò que m' amusa !
Aimi faire clantir nòstra lenga mairala,
E aimi subretot nòstra tèrra ancestrala.
Felibre manteneire escrich al "Cartabèl",
Apari nòstra lenga, es plan nòble e plan bèl.
E puèi lo Felibritge es la granda familha,
Aquò's un grand ostal ont l’amistat congrèa,
Mas per èstre complet me cal dire mon atge :
Ai setanta e uèch ans siòi papeta e ... sage !
Se volètz mon retrach, siòi pas un gigant,
Fau gaireben sèt palms, amai en plan pagant.
Siòi nascut al Poget, lo país dels Bomians (1),
Lo país de mos reires, lo país de mon grand,
De mon grand "Lo Comís". Per clausir vos dirai,
Siòi felen del « Comis », « Comisset » per escais.

René Caylus
(1) Bomians : escais dels estatjants del Poget

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau