F. Chabrier

Joan Forièr mençona pas aquel autor dins son diccionari dels autors de lenga d'òc de 1800 a uòi. En trobant dins lo Bram aquel tèxt en grafia normalizada lo creseguère montpelhieirenc. De fach G Jourdanne dins son "Histoire du Felibrige" (1897) mençona (p 130) "Ferdinand Chabrier qui agite allègrement les grelots du Cascavel ["Lo cascavèl que tinda un còp per mes", a paru à Alès de mars 1892 à Mai 1895]. L'autor seriá donc puslèu raiòu que Montpelhieirenc. La diferéncia es pas granda e lo tòn badinaire rèsta agradós, e mai si pas una condrecha leiçon de civisme. Vese pas perqué lo levariái d'aicí...

UN POÈMA DE CIRCONSTÀNCIA

Es pas besonh d’avedre un deputat

Se vòta mai, e lèu totes en banda,

Los messorguièrs vèrs nautres son venguts,

Au sens -lo -sòu, cadun se recomanda

Passan pertot, doblidan pas degun

Sarran las mans, fan portar la botelha,

Parlan de dreits, d’amor, de libertat…

Per beure un còp, l’estiu, sota la trelha,

Es pas besonh d’avedre un deputat.

Sus quatre pòstes, au mitan de la plaça,

Nòstres monsens se carran , gròsses e grasses :

A l’entorn, crida la populaça :

« A !…Òsca !…Bada que badaràs ! »

Nautres, dau temps que prenon la paraula,

Tastem l’oliva e lo lapin sautat ;

Bons companhons, per se ben tenir a taula,

Es pas besonh d’avedre un deputat.

Dison : « Portam la jòia e l’esperança :

Deseretats, volèm vòstre bonur,

Mens de trabalh e melhora pitança

Cadun sa part, enfin, sota l’azur ».

Qu’un tarnagàs se fisa a sas promessas,

Amb Babèu, sabèm cossí votar :

Per rire un pauc, potonar sa mestressa,

Es pas besonh d’un deputat !

Roges o blancs ganhan sos quinze mila

Amai sovent, encara, n’an pas pron ;

Vivon galhards, e an d’automobilas,

Ambe l’argent dau paure mascaron,

En esperant son talhon dau formatge,

L’obrièr, totjorn, serà l’ase bastat.

Amics, d’abòrd, aimem nòstre vilatge.

Puèi nommarem, se cal un deputat

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau
Pagina de Renat Caylus dich lo Comisset
Pagina dau Bram dau Clapàs... una revista montpelhieirenca en òc de descobrir e de sosténer