Avio l’er d’un coursaire embé soun iol tapat
E pioi en matamouro, un jour es arribat !
« Mesfisas-vous, amics, d’aquel bel trepountin !
D’aquel bel ouratour, couneissen lou refrin !
N’ai counegut un autre, io d’aco seissant’ans :
Aprenes vostr’istoria e coumprendres, efants ! »
Es un om’a coumbatre, d’ideias dangeirousas
Que sembloun agradivas, me soun perniciousas !
Ven per nous insulta, nautres omes d’esquerra ;
Nous laissen pas trufa per aquelas manieras !
Aquel bargouinaire ven douna de leiçouns ;
Voulen pas las recebre e de toutas faiçouns
Seguiren pas un ome que manifestamen
Desais la Republica e soun gouvernamen !
Io mai de cinquant’ans, aurio troubat sa plaça
A coustat das facistes, amics das Alemands !
E aquelas ideias, creses-me, mous efants,
Soun pourtairas de dols ! Aqui moun sang se glaça !
Toutes lous qu’an loucha per nostra libertat
E que luèn dau païs, tout cop memes an brulat
Nous cridoun, mous amics : « Ne fagues pas fisença ! »
Adieu la Libertat embé l’estrema drecha !
Aquel grand messourguier, per escoundre l’istoria
De Dachau, Mathausen, de pla trista memoria,
Disio dins soun discours, refusa l’egsistencia !
Creses-me, per ma part, cal força de paciença
A lous que nous gouvernoun ! Per ieu o meritat
D’un cop de ped au quioul, estre escoumenchat !
Eilas, l’aven pla vist ! Darrieras eleicieus
Sas ideias an ganhat, meichanta pousicieu :
Iranje e Touloun per conse an causit
Un ome que sourtis d’aquel trasse partit !
Cal se moubilisa, mesfisas-vous efants,
Couma lous Espanhaus, criden : « No passaran ! »
Es la crida dau cor, d’un vielh republican…
Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau
Pagina de Renat Caylus dich lo Comisset
Pagina dau Bram dau Clapàs... una revista montpelhieirenca en òc de descobrir e de sosténer