Josèp Marcellin
Omenatge a una bèla Cevenòla
ÒDA ALS DEBASSES DE GANGE
Dels tractats tecnico- economics d’Olivièr de Serres a las scènas bucolicas de F. Mistral, la manhanariá a fòrça inspirat escrivans, poètas e autres rimassejaires. Avèm preferit aquela òda qu’es de nòstre rodol e que tradusís l’importànçia de la seda un còp èra dins nòstre país.
Dins vòstra seda flame nòu,
Per lo mond entièr prenètz vòl
Polit, polit debasses de Gange.
Una Mirelha cevenòla,
Nimfa dels valons e de las còlas,
Reculhissent d’una bestiòla
Lo palais, l’ostalet, lo nis, un pichòt uòu,
Foguèt de vòstra destinada
L’encantarèla e bona fada
Polit, polit debasses de Gange.
D’aquel fial d’aur qu’òm vei a pena,
Una autra nimfa de Cevenas,
Debanant la leugièra trena,
Que corís entre sos dets coma un saur rajòl,
En vos tenent sus sa bacina,
Foguèt vòstra genta mairina,
Polit, polit debasses de Gange.
Mas, d’aquela esbleugissenta escanha,
Dels mila rebats de l’aiganha,
Una autra nimfa, fina aranha,
Risoleta e cantant coma un gai rossinhòl,
Teis un vèl leugièr coma l’aire,
E vos vei naisser, urosa maire,
Polit, polit debasses de Gange.
Sortit de las mans de tres Divessas,
Podiatz èstre pas qu’una careça,
Un quicòm de requista finessa,
Un rai, un perfum del país cevenòl :
Coma una mossa satinada
A d’autras nimfas destinada,
Polit, polit debasses de Gange.
De qué seretz ?…Una suspresa,
Un vam de delicadesa,
Un present a una mestressa,
Un omenatge d’amor, bèl atal coma Dieu lo vòl ?
Lo prefaci doç e subtil
De qualque pur e fresc idilli ?
Polit, polit debasses de Gange.
De qui serà la camba fina
Que vòstra sopla mossolina
Motlarà la forma divina ?
D’una artista, una dama, una Reina ? Se pòt !
Benlèu d’una genta pastressa,
Car de pertot i a de Divessas,
Polit, polit debasses de Gange.
Color de flor, color d’irange
O d’un blau pres al cèl de Gange,
Semblant tescuts pas que pels àngels,
Ò ! produches d’un bèl art e de nòstre vièlh sòl,
Envolatz-vos als quatre caires,
De jòia e d’amor siatz portaires,
Polit, polit debasses de Gange.
Dins vòstra seda flame nòu,
Per lo mond entièr prenètz vòl !
Referéncias : « Les chemins de la soie ». Ed : Espaces Écrits. Tirat dau "Bram dau Clapàs" N°69, Junh de 2002.
Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau
Pagina de Renat Caylus dich lo Comisset
Pagina dau Bram dau Clapàs... una revista montpelhieirenca en òc de descobrir e de sosténer