Ernèst Gaubèrt

Ai agut conoissença d'aqueste poèta dau vilatge de la Ròca, pròche Ganges, per la Sant Joan de 2005 a Virsec ont disiái de còntes en occitan. I rescontrère un deliciós occitanofòn dau país, monsur Hervé Secondy que demòra a La Ròca tot l'ivèrn, e m'a recitat de memòria aquel tèxt que sabiá de per còr. Un autre tèxt titolat "Matin de Mai" se recitava tanben mas monsur Segondy se lo rapelava pas entièr. 

Ernèst Gaubèrt aconselhava a totes sos amics de conservar, d'aparar e de parlar la lenga d'òc. Aquí un bèu programa que i podèm pas qu'aderir a 100%...

Las bugadièiras de mon país

Quand la lauseta matinièira
pita piuta son polit cant
vese passar la bugadièira
que vèrs l'Erau se'n va plan plan

Totjorn espia dins la luna
de fes rambalha del castèl
e n'entende totjorn quauqu'una
qu'a oblidat son batarèl

ò! per aquí vendretz pas dire
que n'aurai pas la carn de pol
fa dejà tres còps que me vire
Mon Dieu! Mon Dieu! quante sadol!

E puòi aval lòng del ribatge
son au mens quinze, benlèu mai
e se l'endrech manca d'ombratge
aquí se blaga mai que mai!

Finon comença la charrada
escacalassa, tot seguís
aquòs e la baçarelada
fa trefolir l'aucèl del nis.

N' i a per lo vièlh, la joina filha
e lo malaute e lo galhard,
lo rasim verd, la passarilha,
chacun son torn chacun sa part.

E dins l'aigueta clarinèla
se miralha tot nòstre cièl
lo prat florit, las jovencèlas
ma vièlha torre e son castèl

òi! òi! contatz fòrça sornetas
al polit Erau que corrís
que siagatz joinas o mametas
vos cante, filhas del país!

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX-XXI
Retorn a l'ensenhador generau