Rei de la tèrra desèrta...

Rei de la tèrra desèrta

dins l'uscle dau bèl estiu

vai ton palafré d'aur viu

filh de l'euse e de la nèrta.

Vai silent e pensatiu

rei dolent dins la lutz cèrta

rei valent - ta man dobèrta

pagelant lo temps caitiu.

Au mitan dau cèl saurin

i a la torre blanquinosa

sus lo grand sèrre blavenc

ont t'espèra espic d'aur prim

la jove reina amorosa

òrba de patz e de vent.