Xavièr de Pèire

N. 1819 (env.)

Lo diccionari de Clerc indica que, originari de Montpelhièr, se rendiguèt a Montpelhièr per i exercçar la profession d'agent-voyer (?). Lai publiquèt, amb un long prefaci de Ferdinand Fabre, las "Récréations poétiques avec commentaires" (1855). Collabòra au "Felibritge Latin"...

 

 

Los laguis dau pastrilhon 
 
Mostre de sòrt! Maladicion ! 
Vene fòl, soi sus la grasilha; 
Ai lo cap en revolucion : 
Manja-favas m'a pres Francilha ! 
Dempuòi aquel mema moment 
Ai de tavans dins la barreta ; 
En colèra soi talament 
Que n'estripariái ma boneta. 
Mès o manjarà pas sans sau, 
Ne’n vòle secotre un tanatge, 
A mon lairon, a l’animau
Qu’es l’encausa que desmainatge !  
Quand nos traparem nas a nas 
A chaca fes per lo  campèstre,
I apromete a-nd’aquel rascàs, 
Un fret servit de man de mèstre. 
Ieu, que vesiái, dins la Françon
La pus brava de las pastoras, 
La dròlla, coma un polisson, 
Me n’emmanda acampar d’amoras..!
Qu’èra bèl temps quand totes dos
A la prada e per las garrigas
Totjorn en nos faguent l’uòlh doç
Ensèms gardàvem las beligas
 
A Francilha, quand o caliá
Davans delargar de la jaça
Fasiái téner la cambaliá 
ié penchinave la tinhassa;
 
Jot los castanhs, quand dormissiá
De son jaç las moscas cochave 
E, se l’idèa m’o disiá
Las gautas ié potonejave
Per aquela lifra tot còp
Anave raflar las cerièiras 
Las peras e los aubricòts 
Totas las fruchas printanièiras.
 
Uòi que Francilha m’a  mandat
À la  pesca antau sans pigresa,
Soi vengut d’a fons dessenat :
Lo dimenge manque la messa !
Dins mon sòm vese la chaton
Aladonc lo còr me forfolha
Los tavans qu’ai dins lo plafon
Tota la nuòch lai fan patrolha.
Quand me pense que la Françon
Dau pargue m’a tancat la pòrta
Sans ges de mena de faiçon 
Soi fòl e lo diaussis m’empòrta  
Mai d'un còp d'anar me negar 
Dins ma foliá me pren l'enveja, 
Aquò fariái sans alongar, 
Se crenhissiái pas l'aiga freja. 
-« Ne'n traparem una autra, vai ! 
Mon paure enfant, me ditz ma maire, 
Es ieu que te la cercarai, 
E l'aurem sans demorar gaire. » 
Mès ieu ? doblidar la Françon ? 
Amai que siágue una bigressa, 
Podre pus ié far de poton, 
Pòt pas dintrar dins ma cabeça. 

(armanac montpelhieirenc per l'annada 1900)

 

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XIX
Retorn a l'ensenhador generau

Retorn au portanèl d'intrada