Esteve Delmàs
(1870-1910)
Collaborator abondós de la "Campana de Magalona", ont de vèrses risolièrs e de cronicas sieunas sai que revolucionan pas la literatura, mas trasmeton lo montpelhieirenc. I signa "Cacaracà". Cau pasmens reténer de pròsas carnavalescas ("lo jutjament dau Caramentrant, Gargantuàs premièr au Clapàs, lo procés de dòna Gargamèla rèina dau carnaval clapassièr en 1898...") e tanben una interessanta tièira de tèxts ont per cada escais nom de vilatge cònta l'istorieta risolièira que l'explica. I tornarem. Siaguèt jota-oficièr de carrièira puòi emplegat als camins de fèrre dau PLM. Dins la Campana de Magalona (166, 15-30 Junh 1899) aprenèm qu'èra conductor de la Vòia au camin de fèrre a Vèinas dins las Aups. Ont se fiancèt amb la tota genta Mlla Nesilda Merle, filha de M Merle, conorolaire dels telegrafes de la companhiá PLM a Nimes.
Mistral i mandèt aiçò:
N'a pas quau vòu lou mèrle blanc ni la merlato fino mai tu pos canta barbelant car ta felicita divino dins vòsti noum astra, gau de mas, se devino
Maiano en Prouvènço, 7 d'Agoust 1899
Per començar, un pichon sonet que daverèt una mençon als jòcs florals de la Societat dels felibres de París. Lo subjècte impausat èra: "La Poma d'Amor".
La Poma d'Amor
N'i a que fan de foliás d'un pol per sa carn blanca d'autres qua'n perdigalh aiman faire m'amor per ieu - chacun son gost! - apelatz-me palanca se volètz, mès mon tic es la poma d'amor!
Mai d'un còp per sopar quand ai ben mes la tanca dabans un bòn platat rosselet, cuòch au forn, m'ataule, e, risolièr - ma joia es la pus franca, envale ma panada, un bon flàsco' a l'entorn.
En saussa, acompanhant vedèl o costeleta, que siague sitòst-fèt o crusa, en vinagreta, es per ieu un regal. E ben, ara, es antau!
Embé quauques corals, en pebrada o bolidas, o ben a la sartan, aqui pas tròp rostidas, las pomas d'amor son lo bon plat de l'ostau.
7 de Mai de 1897
La Campana de Magalona N°123, 1-15 Agost de 1897, p 7
Retorn
a l'ensenhador de la literatura montpelhieirenca d'òc
Retorn
a l'ensenhador de la literatura dau sègle XIX
Retorn
a l'ensenhador generau