Jot un balcon

Farcejada clapassièira en 1 Acte

SCENA I

TIMBOL

dintra en cançonejant.

- ... Nòu oras: la manida es pas 'ncara cochada; siái tremolant, ai paur, benlèu ma serenada farà bòfias d'a fons, e me'n vau restar cort !...

Tant pis ! n'ai pro de pensar qu'ela tot lo jorn sens podre ié cridar çò que, dins ma peitrina, me travèrsa lo còr tres palms darrièrs l'esquina. Oi, òi ! n'ai pro ! Vòle ié o dire; arribarà çò que lo Dieu de las Amors amont, vodrà. Despuòi un mes totara, aquò's pas una vida de la veire passar, tant fresca e tant polida sens ausar ié contar çò que me fai sofrir. Aquò pòt pas durar. Me sentisse morir... Me sovendrai totjorn dau còp que la veguère per la prumièira fes ! A ! d'aquel jorn l'aimère. Un vèspre, ère assetat en cò d'Ospitalièr emb Tistet lo pintre et Joan lo borralhièr. Parlàvem totes tres, de tot... e mai dau rèsta. Quand lo veire es pas luònh, botatz!, la lenga es lèsta. E l'òm se'n paga un bòn de rire e galejar ! Nòstre mièg èra à pont e l'anàvem quichar. Just a -n-aquel moment, au bot de la carrièira te vesèm espelir tot l'atalhièr Lanièira. Eran ben nòu o dètz, charmantas mens o mai, mès una, subretot, m'agradèt que non sai. Me sentiguère aquí coma un grand còp de barra. Mon estomac faguèt : flic-flac. Lo fai encara. Dau còp, mon paure còr seguèt tant esmogut que n'acabère pas mon veire mièg begut... Passèt tot en riguent, ela emb sas amigas, sens se dobtar que ieu semblave sus d'ortigas. Aquò seguèt finit. Crese que morirai. Mès abans de morir, maugrat tot, ié dirai en de verses qu'ai fach per ela, mon martire. Desempuòi aquel jorn, sosque: brame o sospire, mange pas pus, beve pas pus, semble abestit, me passege pertot, tristàs, embalausit. Per la veire passar, fariái cinquanta lègas. E uòi, trefoliguent, ai quitat mos colègas car i teniái pas pus. Tanben, vène, afogat, sus aquel estrument qu'un amic m'a... logat, aqueste vèspre, ié gratar ma serenada...

I a de monde, segur, la lampa es alumada. Anam començar. Zo! cau pas mai esperar, se fai tard, dins un momenet se cocharà.

(Se mes à cantar, en s'acompanhant sus una vièlha guitarda. Er: "Le soleil a quitté la terre"...)

La nuòch arriba e chaca estèla
Que lusís dins lo celestiau
Canta l'esplendor de ma bèla
E l'èr es linde, e tot es suau...
Ve, la luna dejà s'argenta,
Los nívols passan doçament.
O ma bruna e polida genta,
Vers tus se'n vai mon pensament!
Digús
Digús
Coma ieu t'aimarà pas pus...

Refrin
O! de ton nis
Vei mon rebaladís
Soi amagat
Jos ton balcon 'scultat;
Escota-me
O miga, diga-me
quora es lo jorn
qu'entendràs mon amor?
Escota -me
E respond-me
Dedins ton nis !

(Espera un momenet, puòi ditz)

Pas res ! sai que benlèu ié seriá pas, la bruna?
E ieu, coma un Pierròt, cantariái per la Luna !
(Recomença de cantar)
Despuòi tant de temps que sofrisse
Vòle te cridar mon amor;
L'ora vendrà lèu, o sentisse,
Que me respondràs à ton torn.
Sai que seràs pas tant crudèla
Per restar muda en ton ostau
e, dau temps que mon còr barbèla
De faire un doble torn de clau !

Refrin.
(mème jòc que pus naut: - puòi) :

Pas mai ! Vese pas res. De qu'es aquela filha ! Me laissa aquí cantar, e d'aquel temps, ropilha ! L'ase fique ! Tant pis: la desrevelharai. Cantarai, bramarai, e se cau, tustarai ! (Repren)
Siás mai blanca que la cauç blanca
Que tripotege en trabalhant;
E coma un aucèl sus la branca
Vòle t'enclausir de mon cant...
Quand siái quilhat sus un estatge
En bastiguent un ostau nòu,
Res qu'à pensar ton bèu visatge
Manque m'espotir per lo sòu !

Refrin.
(Mème jòc tornarmai)

Bondieu ! ara n'ai pro de faire lo pantèn; Soi alassat : s'aviái encara un estrapontin ! Ensajem mai un còp. Se ditz que la paciéncia reüssís ben sovent. An, Timbol, recomença ! Veses donc pas çò que reclama mon còr dolent e matrassat? Escota l'amorós que brama! Mòstra-te plena de bontat. Respond donc lèu à ma preguièra, o senon, ieu me tuarai s'as pas pietat de ma misèra, vau me fotre en tràvèrs dau ralh ! O! de ton nis... :
(S'arrèsta un brieu, escota; puòi)
A! la breganda ! ditz pas res. Anem, es decidat... Un... un... dos... dos... e tres ! (faussa sortida)

SCÈNA II

Timbol, Justin

(Lo sarralhièr dintra, un pauc... esmogut; espincha a drecha, a gaucha, puòi parla).

JUSTIN, que se crei sol.

A ! vejaquí l'ostau ! l'ostau de la manida. Vau podre i canta, d'una voètz trefolida...

(Bronca, e manca se ficar au sòu).
Nom de nom ! auriái pas begut un còp de tròp (Lo manòbre se revira e ditz)

TIMBOL
Quauqu'un ! restem... me tuarai un autre còp. (Se vai rescondre dins un canton).

SCÈNA III

JUSTIN, SOL.

Dins aquela carrièira, òm i vei pas de rèsta. Broncave, d'un pauc mai ! La letra es dins ma vèsta, es lo moment, i a pas digús.

TIMBOL
Amaguem-nos !

JUSTIN
O ! se me respondiá... Coma seriái urós ! I a dejà quauque temps que l'ai arremarcada. Trabalhe en cò dau sarralhièr, pròcha l'arcada qu'es au fons de la Blancariá. Tres còps per jorn: lo matin en dejunant, quand me'n vau a miègjorn, e puòi, l'après-dinnar, ieu la vese que passa. La devinhe quand vèn, m'aplante en bòna plaça. Un còp, èra un dijòus, crese, m'a regardat. Ne'n soi restat tres jorns de bonur tot coflat ! Me vesiái dins lo trin, esmogut - e mai fòrça - que fasiám totes dos nòstre viatge de nòça.

Un matin (a! d'aquò me'n sovendrai longtemps) trabalhave davans la pòrta. D'aquel temps passèt tot ras de ieu, sentiguère sa rauba me tocar lo ginolh : ère color de mauva. Sabe pas s'o faguèt exprès o s'o lachèt, son mocador brodat darrièrs ela tombèt. Faguère pas qu'un saut, vite lo ramassère, la casqueta a la man, rojàs, ié lo portère... Me diguèt : gramecís, d'un èr tant amistós que n'ai plorat de jòia, après, de rescondons. A la fin , me soi dich : siás un bòn trabalhaire, seràs lèu obrièr, coma un autre pòs plaire. Quitem pas refrejar lo fèrre tant qu'es caud. La manida a bòn biais, sortís d'un bòn ostau, sap picar, cordurar, montarà sas teletas, sens penecar poirem manjar de costeletas... Ieu, un d'aquestes jorns, ganharai quatre francs. Seguère reformat, farai pas mos dos ans, podèm nos maridar. Avans tot ié cau dire que lo jorn e la nuòch per sos bèus uòlh sospire. Aquí ò qu'ai pensat e sens mai discutar fabriquère una letra e la vène portar..

(Sortís un papièr, e legís)

Crese que vène baug d'amor;
Miga, respònd a ma preguièra,
Sabes ben que sèm sus la terra
Per faire un viatge qu'es tròp cort...

Adonc, profitem de la vida,
Passem dau milhor nòstre temps;
Res n'es pus bèu per un jovent
Que d'èstre aimat d'una manida.

E ieu, que t'aime a la foliá,
Que dau vèspre au matin sospire
Ma paura pluma sap pas dire
De qu'es l'amor d'un sarralhièr
Un pantais que jamai s'arrèsta
Es totjorn doç e agradiu:
Me crese mai que lo bòn Dieu,
Ai paur de ne'n perdre la testa..
Se coma lo mieu fai tic-tòc
Ton pichòt còr, galanta bruna,
Diga-me-z-o qu'au clar de luna
Los soudarem au mème estòc !
Auriám bèu nis, bèla nisada
Se metiás ta man dins ma man;
Units per lo mème ligam,
Seriái lo Rèi, e tus la Fada...
Totjorn pense a tus, en tot luòc
Onte m'atròbe. Ton image
Vèn per empusar mon coratge
E per faire flambar mon fuòc
Lo fuòc de la fòrja crudèla;
i a pas de bufets a vapor
tant fòrts que tus per bailar pro
d'èr au brasièr. Siás totjorn bèla,
Mai que lo fèrre roge es caud;
Tos detons sont fachs per la seda
òm trobariá ges de moneda
Per te pagar coma lo cau...

Siás pas une filha de luxe,
que ton amor me fariá gaug !
La vida dins nòstre fogau
Serà 'na luna sens esclùssi...
Encara cauda de potons,
Aicí ma letra, benaimada,
Soi aquí, a la cantonada
Que t'espère de rescondons...

Signat : Justin Clavèl, per escais-nom Titòla.

E mai que siágue pas estat gaire a l'escòla, vire un bilhet, benlèu, tant ben qu'un escrivan...

SCÈNA IV

JUSTIN, TIMBOL

TIMBOL , sortís de son canton, e vèn au sarralhièr.

Diga, l'amic, sai que auriás pas besonh d'un còp de man per ié faire passar ta letra, qu'es tant bèla? Se la legís, vai pas languir, la domaisèla! Ieu, me soi regalat de l'ausir... Paure baug, cau pas t'imaginar que siás sol a l'ostau.

JUSTIN
D'onte sortís aquel ?

TIMBOL
Sèm dos, Monsur Titola ! Embé ton còl de gal e ta tèstà d'angròla s'esperes enclausir la pichòta, siás cort. Chabal, aquela empega! Un sotàs, un cabord, me vendriá, jot lo nas, enlevar la manida ! A, lo vòle pas ! A, jamai de la vida ! Se me conoisses pas, me'n vau me presentar e s'aquò sufís pas, l'amic, per t'arrestar, farem parlar Monsur Solièr...

JUSTIN

Dequé t'enfuòca? Soi encara pro grand per t'apegar 'na mòca. Ton nom me fai pas res. D'abòrd, entendem-nos. De qué fasiás aquí, tot sol, de rescondons, quand soi vengut portar ma letra ?

TIMBOL
Escotave.

JUSTIN
De quante drech ?

TIMBOL
Davans que venguèsses, cantave !

JUSTIN

Cantaves ; e per quau?

TIMBOL
Per quau? O sabes ben! Per la mèma que tus : l'aime, ieu atanben.

JUSTIN

Vese pas ben perqué vènes me cercar retna. Podèm ben, totes dos, davalar dins l'arena...

TIMBOL
Monsur lo matadòr, o prenètz ben de naut!

JUSTIN
Eh ! Monsur l'Escotaire, o prene coma cau...

TIMBOL
Siás urós que sèm pas au temps de Loís trètze, veiriás quante duèl ! Te sortiriái lo fètge !

JUSTIN
E ieu, te sortiriái las tripas e lo lèu !

TIMBOL

Ieu sol deve restar. Te n'anaràs

JUSTIN
Benlèu ! Coma tus, ai lo drech de dire ma pensada

TIMBOL

òi ! mès ieu lo prumièr bailère serenada. Passaràs lo segond.

JUSTIN

I a pas ges de prumièr. I a ieu, Justin Clavèl Titòla, sarralhièr. E i a tus, sabe pas quau siás...

TIMBOL
Timbol, manòbre, de mon nom: Pèire-Andrieu-Antòni-Jan Sidòbre. Soi conogut per tot lo plan de l'Olivièr, e despuòi Sant-Matieu jusqu'a la Blancariá digús s'es pas jamai ficat de ieu en faça. Coma d'autres, Clavèl, vau te riblar a ta plaça.

JUSTIN
ò!là! quante topet ! l'amic, se fas antau, o faràs pas 'mbé ieu. Diga, sarra-te'n pauc, abestit!...

TIMBOL
Sarralhièr, ton parlar m'enquiquina, vas te faire fretar lo reble amai l'esquina.

JUSTIN
Bondieu! l'avètz pas vist, aquel estanciur? Sufís qu'es lo prumièr vos cercariá malur. Grand sotàs !

TIMBOL
Tròn ! aquesta fes, es la darnièira, e la man me prusís. Ase! Tèsta de nièira ! Cigarro !

JUSTIN
Nom de nom !

(Van s'emponhar : mès s'ausís a-m-aquel moment la voètz dau perruquièr : arriba en parlant tot sol e diguent de mots sans seguida... Dau còp, Timbol e Justin se desseparan.

SCÈNA V

TIMBOL , JUSTIN, ANTONI

ANTONI

Ondulats!... Perfumats ! .. Coma un boquet de flors, ò peusses ben-aimats...

JUSTIN

Dequ'es?... Un inocent?... Vèn aici...

TIMBOL
Chut ! Escota.

ANTONI
Mai pur que lo vin pur que raja de la bota...

JUSTIN
De qué ditz?

TIMBOL

Taisa-te ! Es un autre amorós.

JUSTIN
Tres ! Se ne'n causís un, n'i aurà dos de jalós...

(Justin e Timbol se rescóndon.)

ANTONI

Encò de Delmòn, perfumaire soi emplegat barbièr-rasclaire, soi perruquièr; e, joine e polit, trelusisse. De mon bòn biais embalausisse La Blancariá ! En espinchant darrièrs lo veire, sovent m'es arribat de veire, doç sovenir, una agradiva cordurièira de Madomaisèla Lanièira, anar, venir... Coma un trobador a sa dama, tanben, tot l'amor de mon anma vòle cantar! Embé l'assegurança urosa qu'es aquí, darrièrs sa jalosa per m'escotar.

Sos peusses color de castanha perfumats a la pèl d'Espanha M'an embaumat E despuòi lo jorn que l'ai vista se passejant, fina e requista, soi enfuocat !

JUSTIN, a voètz bassa.
Au fuòc ! Zo!, los pompièrs !

TIMBOL , mème jòc.

Es un fuòc de ramilha. E puòi, nòstres pompièrs, segur, fan la manilha.

ANTONI

A la carrièira Santa-Ursulla mon cor se carcina e se brutla, lo jorn, la nuòch; dèu èstre, despuòi qu'aquò dura per tant que sa pèl siágue dura, cuòch e recuòch...

TIMBOL , coma pus naut
Seriá pas rabinat...

ANTONI
La peteta fina e leugièira expausada a la bijotièira de mon patron, a son constat, s'òm l'arregarda, reverta la França-Camarda de pont per pont.

JUSTIN, totjorn bas
Ai, d'aquel compliment !

ANTONI

Au respèct d'ela, las servietas e lo malbre de las cuvetas son sans blancor. Fai esvalir das sabonetas e de las aigas de teletas la bòna odor.

TIMBOL, même jòc

Deu sentir lo lilàs, o la violeta au mens...

ANTONI

De còps, rasclant embé coratge mès distrach per son bèu vistage joine e friand, faguère mai d'una bercada dessús la gauta sabonada d'un bòn client.

JUSTIN, même joc

I anarai pas jamai me fa 'rasclar la closca !

ANTONI

En tripotejant la tinhassa plena de lendes o de crassa d'un abonat, sovent lo regrèt me rosiga, dins aquela salla botiga, d'èstre embarrat.

TIMBOL, totjorn bas

O siás pas pro'mbarrat, rascla-codenas !

JUSTIN, Mème jòc
-òsca !

ANTONI

Ausís ma voètz tendra e devòta! Me fagues pas, ò ma minhòta, desborronar, o me'n vau (emb'una sietada de cosmetica e de pomada) m'empoisonar !

(Timbol e Justin s'avançan pauc a pauc, e quand Antòni a finit) :

TIMBOL

Ara qu'avètz finit, caudriá s'entendre un còp. N'i a tres, aicí. Dels tres... sètz au mens dos de tròp.

JUSTIN

Sètz pas qu'un e demí. (A Timbol) Còmptas pas per un òme.

TIMBOL

De qu'as dich, mau-fardat?

ANTONI
Taisa-te, pichòt mòme, e vos tanben, l'amic, taisatz-vos au pus lèu. Expliquem-nos en patz..!

TIMBOL
Vai-te'n còpar ton peu. De qué te siás passat? Empoisonas, pudisses...

JUSTIN, a Antòni
Vengues pas caucigar, tus, nòstres agacisses.

ANTONI
D'abord, vos, mon amic, cau pas me parlar tus.

JUSTIN
Monsur lo Perruquièr, vos o dirai pas pus. Caudriá pas, per asard, cargar de gants de seda?

ANTONI, après avudre regardat las manassas de Justin

Nani, per los crompar, caudriá tròp de moneda !

TIMBOL

Quand auretz acabat totes vòstres saluts explicaretz un pauc perdequé sètz venguts ?

JUSTIN

Coma èras lo prumièr, debana ton escanha, puòi parlarai, e lo merchand de pèl d'Espanha...

ANTONI, à Justin

Escusatz, es pas ieu... (a Timbol). Te demande perdon.

JUSTIN

De qué ditz? ...

TIMBOL (a Antòni)

Siás pas tus!

ANTONI

Dise qu'es mon patron...

TIMBOL

Ton patron es aicí?

JUSTIN

E ben, m'o caudriá veire: sans aquò, mon amic, jamai o poirai creire.

ANTONI

Mès nani ! Es pas aicí ! Es el que vend la pèl...

TIMBOL

Quanta pèl? De moton, de lapin, o d'anhèl?

ANTONI

La pèl d'Espanha!

JUSTIN

Enfin a finit per o dire !

TIMBOL

Que siás lòng, perruquièr; fas sofrir lo martire !

ANTONI

Es vautres qu'avètz tòrt : m'avètz pas ben comprés.

TIMBOL

Barra ton robinet , digues pas pus res.

ANTONI

Es mon patron..

JUSTIN

Mai, son Patron ! N'i a pro per ara!

ANTONI

Es mon patron que vend la pèl d'Espanha...

TIMBOL

D'onte que siágue, aquela pèl, nos fai encara susar...

JUSTIN

E puòi, creseguetz pas qu'es per nos amusar que sèm plantats aicí.

ANTONI

M'amuse pas, pecaire ! N'ai un tíbol, soi las, aquò, me fica'n caire...

JUSTIN

Sabètz de que s'agís : nos trobam tres garcons, dels mèmes uòlhs, dels mèmes peusses amorós... La fiheta, per ges, a pas dobrit la boca, es demorada au lièch, roncant coma uns soca. Per ieu, es que sèm tròp, e qu'ausa pas causir. Tres galants a de ré, n'i a per vos enclausir ! D'entendre tant de bruch, sai que es desvariada. Se, tornar, i fasián un brieu de serenada, chacun a nòstre torn? - A la fin parlarà, e quitarem en patz l'urós que causirà... D'abòrd, e per que i age pas mai una istòria, anam jurar, totes au còp, sus la memòria de nòstres rèire-grands, de pas cercar d'embolh au crespinat, que siágue vos, o tus Timbol, o ieu... (Bas) E quiconet me ditz qu'aurai de vena. (Naut) Adonc, es entendut?...

TIMBOL

Mès, quau aurà l'estrena? Quante començarà?... Me sembla qu'a bòn drech l'onor me revendriá, car ai a mon endrech d'èstre lo bòn prumièr, vengut aicí...

ANTONI

Solide. Mès lo prumièr vengut cau pas que dessoblide los autres que pasmens devon parlar...

TIMBOL

Ocben! Mès quand aurai cantat, cantaretz atanben.

JUSTIN

Anem, per copar cort, vau arrenjar l'afaire. En dos mots: vejaquí çò que nos caudrà faire. Tus, Timbol, passaràs davans, puòi, ieu vendrai. Comtarai jusqu'à vint, alòrs t'arrestarai. Esperarem un pauc, se ditz pas res, me sarre... Cantarai a mon torn, e se ditz pas mai, barre. M'escarte... Perruquièr, disètz vòstre morsèl... ,

TIMBOL

E nos enmasques pas encara embé ta pèl.

JUSTIN

Anem ! Es ben comprés?...

ANTONI

Sentisse qu'en mon còr lo fuòc sacrat davala. Zo ! Zo !, entanchem-nos ! ... que puòi s'amorçariá.

TIMBOL

Mai! E ben ! ... (avisa una plaça sus la muralha) "Prise d'eau" ? Pas besonh de pompièr...

JUSTIN

A ! recomencetz pas de vos cercar disputa...

ANTONI

Fai pas que m'atissar...

TIMBOL

Ai ! quante enfant de puta!

JUSTIN

Pas d'alònguis, es tard; a fach sièis sòms benlèu. Manòbre, t'esperam...

TIMBOL

Ié siái.

ANTONI

Començas ?

TIMBOL

Lèu! (Canta) La nuòch arriba e chaca estèla que lusís dins lo celestiau canta l'esplendor de ma bèla. E l'èr es linde, e tot es siau... Ve, la luna dejà s'argenta...

ANTONI (Lo Còpa)

Vai, vai amaisa-te. As perdut la partida. Es a vos, sarralhièr: encantatz la manida!...

TIMBOL

Te fotes pas de ieu, as pa'ncara ganhat...

ANTONI

Veja aquel grand simbèl ! Semblas un gal banhat !

JUSTIN

Taisatz-vos ! Quitatz-me parlar... (comença de legir) Crese que vène...

TIMBOL, arrapa Antòni per darrièrs.

Simbèl ! as dich : simbèl ! aqueste còp te tène

ANTONI

M'estofas, animau ! Lachas ?... Ai agut tòrt...

TIMBOL

Es pas tròp lèu.

ANTONI

A ! malurós! Soi mitat mòrt.

JUSTIN

Anatz vos carpinhar pus luònh, o me ié mete.

TIMBOL

Nos direm pas pus res.

JUSTIN

Es ben vrai ?

TIMBOL

T'o promete !

JUSTIN, reprend

Crese que vène baug d'amor ! Miga, respònd à ma preguièira. Sabes ben que sèm sus la tèrra per faire un viatge qu'es tròp cort. Adonc profitem de la vida, passem dau milhor nòstre temps...

ANTONI

Vint ! n'i a pro ! Esperatz un pauc...

JUSTIN

Tròn de bòn goi ! Respònd pas ? Ai ! mon Dieu...

TIMBOL

Diga, as pas l'èr galòi...

ANTONI

Es a ieu ! Mos amics, vos planhisse. La bèla seguèt per vòstre amor, benlèu, un pauc crudèla. Aurai mai de bonur.

JUSTIN, a despart

Aurà pas lo topet, sai que , de me quitar per aquel farluquet.

ANTONI, comença son òda

En cò de Delmòn, perfumaire soi emplegat barbièr-rasclaire, soi perruquièr; e, joine e polit, trelusisse. De mon bòn biais embalausisse La Blancariá !

TIMBOL

E vint ! arrèsta-te, pas res...

JUSTIN

Ai ! oi ! respire...

ANTONI

Vai nos fai repausar longtemps, sens venir dire quante es lo que ié plai ?

TIMBOL

Chut ! taisa-te! de lum !

JUSTIN

Sarrem-nos ! se d'asard ne'n sonava quauqu'un, cau èstre ben plaçats

TIMBOL

Suse ?

ANTONI

Soi à l'angòni...

TOTES TRES, un après l'autre

Es ieu, Justin !

Es ieu, Timbol !

Es ieu, Antòni

JUSTIN

Ieu t'aime !

TIMBOL

Ieu t'adòre, o bèl ànjol de Dieu !

ANTONI

Ieu morirai per tus !

TOTES TRES, au còp

O ! Respònd-me !

(La fenèstra s'es dobrida, e... ié tòmba sus lo cap un plen potat d'aiga.)

TOTES TRES, tornamai, au còp

Bondieu !!!

ANTONI

Ròssa ! mon fuòc sacrat es damorçat...

TIMBOL

Gusassa ! Soi trempe coma un rat ; regole...

JUSTIN

Gollamassa !

ANTONI

Me sembla aqueste còp que podèm nos 'n anar. Era pas de besonh de se tant pavonar per prene aquel susatge...

TIMBOL

Es d'aiga de merluça.

JUSTIN

Alòrs s'avèn cantat, es per lo rèi de Prussa ? ... Vodriái, per tot lo mau que vène de sofrir, la penjar, la brutlar.

TIMBOL

Sarralhièr, pòs corrir !

JUSTIN

Aquela traça de fumèla ! ...

ANTONI

Anem, Titòla, Amaisatz-vos : aquò nos servirà d'escòla !

TIMBOL

S'una autra me repesca a faire çò qu'ai fach vòle, jusqu'a ma mòrt, beure pas que de lach !

ANTONI

Se per nos rescaufar - car la brisa es fresqueta - anàvem beure un còp au Cafè de Mameta ?

JUSTIN

Amai dos se volètz ! Benlèu nos secarà ! Mès, davans de partir, aicí nos cau jurar...

ANTONI

Quanta idèia ! De qué volètz jurar?

TIMBOL

Encara! N'ai un sadol !...

ANTONI

Nos a portat malur totara. Es après un serment que sèm estats negats e n'ai pro coma aquò.

JUSTIN

Dequé vos enfonhaz? Escotatz un moment e vos farai comprene quanta resolucion vos vòle faire prene. Jurem que per totjorn quitan aquel solhon. Lo que la tornarà fringar serà'n colhon !

TIMBOL

Vau pas lo bòn « Pernòd » espés, embé de sucre, que baila Ospitalièr...

ANTONI

Diga, pichòt pelucre, coma siás generós ! ela, vau pas, benlèu, solament la mitat dau quart d'un pichòt peu rasclat à-m-un rascós tot romplit de pelada...

TIMBOL

La sallisses alòrs !

JUSTIN

Me sembla, camarada, que de fèt, i anatz pas de man mòrta.

ANTONI

Tanben ! Mès s'atrobatz, monsurs, que nos trata tròp ben, cantatz mai! (a Timbol) Diga, tus, grata' n pauc ta guitarda. Fasètz mai los simbèls ! ... Sentisse la mostarda me prusir dins lo nas, de vos veire tant sòts !

TIMBOL

Coma peta ton foet !

ANTONI

Anatz, banda de chòts! Cigarros! abestits! avètz donc pas vergonha?

JUSTIN

Onte anatz coma aquò?

ANTONI

Cala-te, tus, ibronha!

JUSTIN

Hòu, perruquièr! cresiái qu'òm se parlava vos.

ANTONI

Es vrai; mès lo malur nos rend mai amistós : excusatz, ma paraula a passat ma pensada...

TIMBOL

E puòi, o sabètz ben, quand la lenga es preissada, tus, o vos, es tot un...

JUSTIN

A! per ne'n revenir. Au solèmne serment que deviá nos unir...

ANTONI

Chabal! que parlatz ben!

TIMBOL

I'a quauqu'un que t'o buta

JUSTIN, à Tímbol, signe de la gònha

Vau te faire virar, tus, coma una bordufa... Reprene : anam jurar...

ANTONI

Farà ! n còp !

JUSTIN

Tornarmai ! Quitatz-me donc parlar : finirai pas jamai... Totes levem la man (la minuta es sacrada), e diguem - dejot son balcon - nòstra balada (Comença): balada dau Serment...

ANTONI

... Terribla e vertadièira.

TIMBOL

Que tres galants banhats diguèron pèr carrièira...

ANTONI

Filha, siás estada crudèla. Quand nòstre amor t'avèm cantat, t'admiràvem coma una estèla, soscaàvem après ta bèutat... Maugrat nòstra voètz esmoguda, nos as barrat ta pòrta a clau. La leiçon serà pas perduda. Quand nos reprendàn, farà caud!!!

TIMBOL

Aquò's pas tot, ò farandèla! De ton balcon as damorçat, coma òm damorça una candèla, l'amor que nos aviá 'nfuòcat. D'aquel banh d'aiga corrompuda, nos remembrarem a perpaus. La leiçon serà pas perduda. Quand nos reprendàn, farà caud!!!

JUSTIN

O tus, fringaire, qu'una bèla, d'un regard, a desvariat, mesfisa-te, car la borrèla T'aurà ben lèu empachacat. Fan totas aquò, d'abituda, per nautres, sabèm çò que cau. La leiçon serà pas perduda. Quand nos reprendràn, farà caud!!!

ANTONI

Erem sòts, guindons a la muda...

TIMBOL

Ara, sèm escarnits. Grand gaug !

JUSTIN

La leiçon serà pas perduda.

TOTES TRES, au còp

Quand nos reprendràn, farà caud

RIDÈU.