Stance, a Mounseignou de Chastillon

Se vesèm aprochar lo Rei
e que venga coma l'òm crei,
per pauc que l'armada se mòstre
ieu me vòle faire ensenhar,
puòi que ieu me sabe senhar,
lo Credo, e mai lo Pater nòstre.

Emb un Sant me vòle voar,
que de me voler far tuar
per non prene d'aigasenhada,
b'aime mai dins un benitièr
i cabussar lo cap primièr,
que d'esperar tala jornada.

Devòt au davant d'un autar
aquí vòle faire pietat,
en gemissent cada paraula.
Vau ben mai far de la faiçon
que d'èstre mes en limaçon
dins lo clòsc d'una cagaraula.

L'un ditz que vòu morir zelat
l'autre que vòu èstre brutlat,
ben que se'n siá perdut 1'usatge.
E ieu confesse tot a plat
que vau mai èstre escambarlat
e viure un pauc mai davantatge.

N'autres n'avèm que vos diriàtz
que son totes santifiats,
e sur aquò son d'ateïstas,
que se lo Rei quauque matin
li fasià far trin-trin-Martin,
per sièis blancs se farián papistas.

De la ont deu venir lo lum,
d'aquí vesèm sortir lo fum
qu'en de còls penian d'agnus Dèus.
Que se'n veson per los portaus,
qu'au luòc d'èstre vrais uganauds,
son d'Argus e de Briarèus.

L'òm vei tau dont la profession
deu reprimar la sedicion,
qu'aquel es lo primièr que gronda,
qu'esfrontat vai leugeirament,
sans reçaupre comandament
sur la muralha far la ronda.

L'autre, qu'on a pas mai de sen
d'una tèsta plena de vent,
s'escarta e fai lo necessari.
E perqué fai aquò, digatz ?
Es a causa que non es pas
coma los autres pensionari.

Lo provèrbi, qu'argent fai tot
mai lo ben faire passa tot,
es tròp vertat, e los pus grasses,
encara qu'ajan de moièns,
au jorn d'uòi se faràn paièns,
mai que toquèsson fòrça clòsces.

Tau mesditz, Monsenhor, de vos,
que mai que veguèsse la crotz
e que comptèsson de moninas,
aquel quitariá vitament
los Psaumes e lo testament,
per anar prene de matinas.

Ara emb aquel temps sèm venguts,
que vivat ! mai qu'ajam d'escuts.
Aquí 1'uòlh d'un chacun rodilha,
Tot lo monde vòu grivolar.
Que lo diable siá tant parlar,
quand ieu non tòque de ramilha

Cependant dedins Montpelhièr
i fan coma rats en palhièr
chacun tacha d'i èstre en crèdit,
e nos trobarem au bilhon
se Monsenhor de Chastilhon
non i bota quauque remèdi.