Declaracion del PEN per l'aparament de la diversitat linguistica
Girona 13 de Mai de 2011
Lo tèxt oficial en Fr, Angl e Esp s'atròba sus lo siti del PEN Internacional amb de reviradas dins tota una tièira de lengas. La seccion d'Òc dau PEN participèt a l'elaboracion d'aqueste tèxt: que figura sus lo siti internacional e siaguèt difusit en lenga nòstra abans quitament las versions francesas anglesas e espanhòlas.
Declaracion del PEN per l'aparament de la diversitat linguistica
Lo PEN Internacional recampa los escrivans del mond.
Fa quinze ans, la Declaracion Universala dels Dreches linguistics es estada aprovada e renduda publica a Barcelona per lo Comitat de la Traduccion e dels Dreches linguistics del PEN Internacional. Uèi, aquel meteis Comitat recampat a Girona aprova un manifèst qu'afortís los dètz principis fondamentals d'aquela declaracion universala.
1. La diversitat linguistica es un eretatge cultural de l'umanitat que deu èsser valorizat e protegit.
2. Lo respècte de totas las lengas e de totas las culturas es un element fondamental per bastir e manténer lo dialòg e la patz dins lo mond.
3. Tota persona apren a parlar au dintre d'una comunitat que li dòna la vida, la lenga, la cultura e l'identitat.
4. Las lengas diferentas e los biaisses diferents de parlar son pas solament de mejans de comunicacion; son tanben de mitans diferents ont los umans s'espelisson.
5. Cada comunitat linguistica a lo drech d'emplegar sa lenga coma una lenga oficiala sus son territòri.
6. L'ensenhament escolar deu contribuir a enauçar lo prestigi de la lenga parlada per la comunitat linguistica del territòri.
7. Es necite que los ciutadans aguèsson una conoissença generala de lengas diferentas, qu'aquò afavorís una dobertura intellectuala e emocionala e mai contribuís a la conoissença mai prigonda de lor lenga pròpia.
8. La revirada de tèxtes, mai que mai de las òbras màgers de las diferentas culturas, representa un element màger dins lo procés necessari a una compreneson melhora e un respècte mai grand entre umans.
9. Los mèdia son un pòrtavotz privilegiat per far fonccionar la diversitat linguistica e mai per n'enauçar lo prestigi amb competéncia e rigor.
10. Lo drech d'emplegar e d'aparar sa lenga pròpia deu èsser reconegut per las Nacions Unidas coma un dels dreches umans fondamentals.
Girona lo 13 de Mai de 2011
VERSION DE LA METEISSA DECLARACION EN PROVENÇAU MISTRALENC
|
MANIFESTE DE
GIRONA SUS
LI DRE
DI LENGO 1. La diversita
lenguistico es un eiretage culturau de l’umanita que dèu èstre
valourisa e proutegi. 2. Lou respèt de
touto li lengo e de touto li culturo es un elemen foundamentau pèr basti
e manteni lou dialogue e la pas dins lou mounde. 3. Touto persouno
apren à parla au dintre d’uno coumunauta que ié baio la vido, la
lengo, la culturo e l’identita.
|
DE TELECARGAR
Lo tèxt de la proclamacion dins las tres lengas oficialas del PEN