JORDI MAILLET

(1893-1918),

lo "POÈTA DE LA CAMPANHA MONTPELHIEIRENCA"

Defuntat lo 8 de novembre 1918 sus lo frònt de las armadas . Aviá vint e cinc ans... Apreparava un libre de pròsas simplas e lindas qu'espeliguèt, ço crese, pas jamai... Se seriá sonat: Lo librilhon de la Maselièira.

Anma tendra e delicada, èra, ditz Azemà " tota bontat e tota poësia"...

Son òbra? Una seguida de pajas, vertadièrs poèmas en pròsa, que n'aviá d'avança titrat lo reculh : Lo librilhon de la Maselièira. "Son escrichs , ço ditz Azemà, dins una lenga au còp linda e populara, viventa e requista, e cantanta d'una armonia onte se conois lo musician que doblava, dins Jòrdi Maillet, l'escrivan de lenga d'òc."

E tanben de collaboracions regularas au jornal dels soldats dau frònt, en lenga d'òc: "lo Gal"...

"Se signava das dos escais-noms : Jorget de Pastorèl, e Lo Felibre de la Landa. Pastorèl e Lalanda, aquò's los dos noms portats a de reng per un mème mas, onte Maillet aviá viscut las oras las mai bèlas e las mai plenas de sa tròp corta vida. Se quilha, aquel mas, sus una auçada de la Pompinhana, dominant lo Les e la pissièira dau molin de Sauret, devistant tota l'espandida que s'alarga entre las verduras sanitosas de Castèl-Nòu e l'azur argentat de la Miegterrana."

Evocacion dau personatge e doas pròsas sieunas, d'una sensibilitat tras que requista. Sens granda recèrca estilistica, diràn los esperits freges. Sensibilitat, emocion, a l'estat nadiu. Deliciós s'avètz pas lo còr sec coma un calòs. Assaboratz adonc la charradissa radiofonica de Pèire Azemà sus Ràdio Montpelhièr, lo Dimars 22 de novembre 1938.

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau