Romièg Pach

Romièg Pach, engatjat d'a fons dins l'occitanisme de la fin de las annadas setanta, fondèt a Montpelhièr en 1978 "Aicí e Ara, revista trimestrala independenta". Ont espolsava sens indulgéncia totes los poders, amb un anticonformisme que desagradèt a pro de gents poderoses en plaça. A l'eleccion de Mitterrand en 1981 anèt fins a proclamar: "Sèm totjorn dins l'oposicion", çò que ne faguèt escalustrar mai d'un. La revista durèt fins a 1983. I collaborèron los principaus intellectuals occitans dau temps. Sa tenguda èra qualitadosa. Mas ajudèt pas Romièg Pach a se far d'amics. Era tròp reborsièr. Preniá plaser a escarraunhar los conformismes, quand se pretendiguèsson anticonformistas...  E veguèt pas virar lo temps ont la "pensada unica" prenguèt un poder sens partatge sus las consciéncias intellectualas occitanas. I aviá pas pus ges de plaça per d'èimes liures coma lo sieu. I demorava pas pus qu'a se calar e a partir. O faguèt. 

 En 1979 lo Cercle Occitan de Montpelhièr, l'Escòla dau Paratge e l'Institut d'Estudis Occitans, entamenèron dins la colleccion " A TOTS " l'edicion de las Obras Complètas en occitan de l'abat Fabre. Aquí Romièg Pach trabalhèt a establir una vertadièira edicion critica d'aquel tèxt dau prior de Cèlanòva. Pach, castrés de lengatge, faguèt un esfòrç per escriure en Montpelhieirenc e i capitèt pro ben! Donam son introduccion aquí.

A l'entorn d'aquela revista "Aicí e Ara" se formèt "l'Union del Poble d'Oc", organizacion politica federativa que se perlonguèt d'annadas.

 

Après 1983, RP acceptèt un pòste de legeire de francés en Africa dau Sud ont plan plan se faguèt una plaça dins l'ensenhament superior. D'en primièr a Potchefstroom. Se'n perdís un pauc la traça puòi.

Aquí un article simpatic qu'una jornalista sudafricana consagrèt a Romièg Pach. Ont, ela tanben, trobèt qu'aquel òme èra estonant. E o ditz.

Romièg Pach publiquèt un reculh de poèmas qu'es un pauc un canular literari, e que siaguèt saludat amb estrambord per Ives Roqueta. Causiguèt l'escais de Francés Severac e imaginèt un poèta basc d'origina occitana implicat dins la bolegadissa politica en Euzkadi.

 

Introduccion a l'abbat Favre per Romièg Pach

Carta d'Occitania alestida per Romièg Pach

Autors dau sègle XX finiguent

cronologia

index