Joan LESAFFRE

(1907-1975)

Nascut a Baiona en 1907, doctor en drech e licenciat de sciéncias matematicas... e diplomat d'istòria dau Lengadòc. Dau temps de sos estudis a Montpelhièr, amb Max Roqueta e Rogièr Barta, fondan lo « Novèl Lengadòc » (1930-1934)... un movement estudiant pro dinamic que fai bolegar las consciéncias, anonciant l'evolucion cap a l'occitanisma d''ara. Que los joves dau Novèl Lengadòc i jogaràn un ròtle màger un bèu tèrç de sègle. Lesaffre, per sa capacitat de trabalh e son sentit de l'organizacion, es d'intrada un dels actors centraus de l'aventura..."Exilhat" a París ont ocuparà un emplec d'engenhaire a la direccion de la SNCF, Lesaffre s'atala a un lòng trabalh constructiu de critica literària e istorica, que ne fan un pauc, coma o ditz Barta, lo Ròcaferrièr dau sègle XX. Coma son ancessor esperital, Lesaffre "manejava l'occitan amb fòrça gaubi, (...) totjorn, dins la varietat clapassièra de nòstra lenga vestida de la grafia classica" (Barta), çò que i baila de tot segur una plaça de tria aicí. Son immens trabalh es escampilhat dins d'articles de revistas, emai aguèsse portat mai d'un mièg sègle lo projècte immens de la "Bibliografia Occitana". E lo diccionari dels autors de lenga d'òc de 1800 a uòi, que serà acabat après sa despartida per son amic Joan Fourié.  Tot aquò se legís dins lo bèl article de Rogièr Barta paregut dins OC N°254 estiu de 1976 p47-58).

Donarem de Joan Lesaffre d'articles de critica literària e istorica fòrça documentats en interessants, e de tèxtes literaris (reviradas) pareguts dins "Oc".:

a prepaus dau N° 200 de "Oc" (1956)

una notícia sus Ròcaferrièr.

una notícia sus Carles-Brun.

una notícia sus Josèp Lobet (1874-1952)

Retorn a l'ensenhador de la literatura montpelhieirenca d'òc
Retorn a l'ensenhador de la literatura dau sègle XX
Retorn a l'ensenhador generau