Paulin Vaissada (1864-1945)
Paulin Vaissade : nascut a Clarmont d'Erau en 1864, mòrt a Besièrs en 1945. Poèta òrb, sòci dau Paratge de Montpelhièr, collaborator de « La Cigalo lengadouciano», « La Campana de Magalouna » e de la « Vie montpeliéraine ». Escriguèt de poësias : « A l'entour del brès » (1933), de contes e de faulas : « Joust la trelha » (1934) e mai que de revistas (mena de pèça embé musica) e farsejadas: "En pana à Clermount" (1902); Clarmount perquinaqui (inedich); Sejour clapassiè (inedich); "retour d'Alger " (1934).
Aquest tèxt es paregut dins « lo bram dau Clapàs » N°77, Març de 2003, p10.
SENS GANA L'ivèrn, siái pres de languiment, Al fuòc davant lo soc que plora, Engrepesit, tròbi que l' ora Se rebala tròp doçament.
En brasucant tot tristament Sòmie al sorelh caudet que flora ; Sens gana, me demandi quora Finirà mon agaçament.
Antal, laguiat sus ma cadièira Ma pensada tròp presonièira, Dins las nívols s' estavanís.
Me tarda que la vigondèla (1) Jost mon teulat totjorn fidèla Venga piular dins son vièlh nis.
(1) Vigondèla : irondèla
En 1934 l'Armanac Lengadocian es editat per los felibres narboneses. Amb un portisson de Pèire Azemà que se sentís un pauc despoderat. Mas au meteis moment los joves dau Novèl Lengadòc, los Camprós, Roqueta, Lesaffre, etc... se son levats. E Ismaël Girard publica ja, a Tolosa, un jornalet batalhaire sonat "Oc"...
Paulin Vaissada i escriu un pichon tèxt sus lo mildiu. Lo donam en grafia originala per illustrar la fonetica dau lengatge de l'autor (telecargar en pdf (298 kb). Donarem puòi de passatges de jost la Trelha, que lo lengatge n'es requist e granat.
Retorn
a l'ensenhador de la literatura montpelhieirenca d'òc
Retorn
a l'ensenhador de la literatura dau sègle XX
Retorn a l'ensenhador de la
literatura dau sègle XX-XXI
Retorn a l'ensenhador de la literatura dau sègle XIX